FSu stendur sig vel í BOXINU
Boxið, framkvæmdakeppni framhaldsskólanna, fór fram í Háskólanum í Reykjavík nú um helgina. Metþátttaka var í Boxinu í ár, en alls tóku 29 lið frá 17 skólum þátt í forkeppni sem haldin var fyrr í mánuðinum. Átta lið komust áfram í aðalkeppnina þar á meðal lið FSu. Hin liðin komu frá Fjölbrautaskóla Suðurnesja, Flensborgarskóla, Menntaskólanum á Akureyri, Menntaskólanum í Kópavogi, Menntaskólanum í Reykjavík, Menntaskólanum við Hamrahlíð og Menntaskólanum við Sund.
Í úrslitunum fóru fimm manna lið frá hverjum skóla í gegnum fjölbreytta þrautabraut sem reyndi á bæði á hugvit og verklag. Liðin fóru á milli stöðva og fengu hálftíma til að leysa hverja þraut. Fyrirtækin sem útbjuggu og sáum um þrautirnar voru: Luxor, Jáverk, Radiant Games, Marel, Rafal, Mannvit, Ísloft og Kjörís.
Það var Menntaskólinn á Akureyri sem stóð uppi verðskuldað sem sigurvegari eftir útslitakeppna sem fram fór sl. laugardag í Háskólanum í Reykjavík en FSu hafnaði í 5. sæti. Þess má til gamans geta að aðeins skildu 6 stig 2.-5. sæti svo jafnt var þetta og réðust ekki úrslit fyrr en í lokaþraut.
Í liði FSu voru þau Sverrir Heiðar Davíðsson, Halldóra Íris Magnúsdóttir, Anna Guðrún Þórðardóttir, Guðmundur Bjarnason og Þórir Gauti Pálsson. Þau stóðu sig firna vel, unnu m.a. með glæsibrag þraut sem snerist um að koma beinni sjónvarpsútsendingu í loftið með öllu tilheyrandi og hlutu sérstaka viðurkenningu frá Jáverk fyrir brúarsmíð. Ágústa Ragnarsdóttir, myndlistarkennari, hefur yfirumsjón með Boxinu fyrir hönd FSu.
Að Boxinu standa Samtök iðnaðarins, Háskólinn í Reykjavík og Samband íslenskra framhaldsskólanema. Markmiðið með Boxinu er að kynna og vekja áhuga nemenda í framhaldsskólum á verk- og tækninámi og fjölbreyttum störfum í iðnaði.
Fleiri myndir úr Boxinu má finna á feisbúkksíðu skólans.