Leiklistarnemendur frumsýna

Nemendur í leiklist í FSu sitja ekki auðum höndum þessa dagana. Þau frumsýna verkið Iris eftir Brynhildi Guðjónsdóttur og Ólaf Egil Egilsson í leikstjórn Guðfinnu Gunnarsdóttur, miðvikudaginn 10. apríl kl. 20:30 í litla leikhúsinu við Sigtún.

Verkið fjallar um fjallar um viðburðaríkt líf Irisar, ungrar stúlku, sem á erfitt með að fóta sig í grimmum heimi.

Hópurinn hefur lagt mikið á sig til að æfa undanfarið og mætt á æfingar utan skólatíma. Hópurinn er í góðu samstarfi við Leikfélag Selfoss sem veitir hópnum aðgang að húsnæði sínu og aðstoðar við ljósahönnun og kynningar.

Aðgangur er ókeypis og eru allir velkomnir á meðan húsrúm leyfir. 

Hér má nálgast viðburðinn á fésbókinni.

 

Verkið verður einning sýnt í Hveragerði á lokahátið Þjóðleiks á Suðurlandi þann 27. apríl.

 

Þjóðleikur er leiklistarverkefni haldið að frumkvæði Þjóðleikhússins í samstarfi við fjölmarga aðila á landsbyggðinni. Leikhópum ungs fólks á aldrinum 13-20 ára er boðið að setja upp eitt af þremur nýjum leikverkum sem skrifuð eru sérstaklega fyrir Þjóðleik í hvert sinn. Við uppsetninguna njóta ungmennin stuðnings fagaðila í Þjóðleikhúsinu í formi námskeiða, bæði í Þjóðleikhúsinu og í heimabyggð, og lýkur verkefninu með leiklistarhátíð í viðkomandi landshluta.

 

Þess ber einnig að geta að sami hópur tekur þátt í tónleikunum "Raddir sunnlenskra ungmenna", sem er samstarfsverkefni með unglingakór Selfosskirkju. Tónleikarnir verða í Selfosskirkju sunnudaginn 7. apríl kl. 20.