Haldið fast um bikarinn

Laugardaginn 27. september var haldin árleg keppni á milli Hyskis Höskuldar og Tapsárra  Flóamanna,  bridgesveitar starfsmanna í FSu.  Keppnin var sú 54 í röðinni en keppt er  tvisvar á ári. Samanlagður árangur  þessara tveggja keppna ræður búsetu bikarsins. Eins og sést á myndinni heldur Ingis Ingason fast um bikarinn og mun gripurinn dvelja uppi í hillu yfir bridge-borðinu á kaffistofu FSu næsta árið, líkt og 3 síðustu ár. Leikurinn á laugardaginn fór 77-63 fyrir Tapsára en fyrri leikur ársins fór 69-64, einnig  fyrir Tapsára, þannig að heildarmunurinn varð 19 impar. Staðan í keppni liðanna er sú að Hyski Höskuldar hefur unnið bikarinn 13 sinnum en Tapsárir i 14 skipti þannig að munurinn er lítill.  Heldur hefur þó hallað á Hyskið síðustu ár sem er þó ekki nema von þar sem Flóamenn hafa verið fimm í  síðustu keppnum á meðan Hyskið hefur eingöngu verið með hefðbundinn fjölda spilara eða fjóra. 

Á myndinni má sjá frá vinstri:  Höskuld Jónsson,  Ívar J. Arndal, Daða Garðarsson,  Bergþór Njál Kárason,  Pétur Guðmundsson,  Ingvar Bjarnason,  Ingis Ingason,  Hannes Stefánsson og Helga Hermannsson.  Á myndina vantar sveitaforingja Tapsárra Flóamanna,  Árna Erlingsson.