INNILEGAR HAMINGJUÓSKIR MEÐ FJÖRUTÍU ÁRA AFMÆLIÐ FSu

Fjölbrautaskóli Suðurlands á fjörutíu ára starfsafmæli í dag, mánudaginn 13. september. Mega allir Sunnlendingar óska skólanum og því starfi sem þar hefur verið ræktað innilega til hamingju því heill og hamingja, menntun, manngildi og velferð hefur fylgt þessu skólastarfi frá upphafi vega. Fullyrða má að stofnun skólans haustið 1981 sé einn af hornsteinum í uppbyggingu þessa svæðis sem nær úr vestri frá Þorlákshöfn og til austurs alla leið í Vestur-Skaftafellsýslu.   

Vegna faraldurs er stórum afmælisfagnaði slegið á frest. En þó blésu stjórnendur og starfsmenn skólans til notalegrar samveru eftir kennslu síðastliðinn föstudag, 10. september þar sem Jóhann Böðvar Sigþórsson bakari FSu bar á borð dýrindis krásir og Agnes Ósk Snorradóttir námsráðgjafi skreytti borð í Gaulverjabæ (sem er heitið á hátíðarsal skólans) með dyggri aðstoð margra starfsmanna. Þegar margir leggja hönd á plóg gerast ævintýri og það hefur alltaf einkennt starfsemi FSu.

Nokkrir tóku til máls þar á meðal fulltrúar ungmennafélags skólans, sem eru þeir sem hætt hafa störfum vegna aldurs, Elísabet Valtýsdóttir dönskukennari, Vera Valgarðsdóttir frönskukennari og Nanna Þorláksdóttir skrifstofumær og færðu skólanum blómvönd. Sigþrúður Harðardóttir, núverandi kennari og þáverandi nemandi (árið 1981) tók til máls og vitnaði til samtals sem hún átti nýverið við Heimi Pálsson, fyrsta skólameistara FSu þar sem hann sagði orðrétt: „Það var ungur, næstum barnungur skólameistari sem setti skólann fyrir 40 árum. Raunverulegur skólasetningadagur átti að vera mánudagur en skólameistaraefnið var nógu þjóðrækið og hjátrúarfullt til að segja við skólanefndina: Við byrjum ekki róður á mánudegi. Ég set skólann á sunnudegi þó svo ég brjóti kjarasamninga og allar reglur. Þetta verður nógu erfiður róður samt. Hann varð erfiður, en hann var undursamlegur.” Síðast en ekki síst tóku Örlygur Karlsson fyrrverandi skólameistari og fulltrúi Hollvarðasamtaka FSu og hinn margfleygi Svanur Ingvarsson, fagstjóri verknáms (og þáverandi nemandi árið 1981) til máls og sögðu sögur af menningu og menntun.

Skólastarf í FSu á sér lifandi og fjölbreytta sögu sem hefur að hluta til verið færð til bókar af Ásmundi Sverri Pálssyni og Gísla Skúlasyni og síðar Gylfa Þorkelssyni í verkinu Hornsteinn í héraði. Von er á nýrri úttekt þessarar sögu í formi afmælisstikla í ritstjórn Örlygs Karlssonar og Gísla Skúlasonar. Í byrjun var skólastarfinu dreift um Selfossbæ og kennsla fór fram í ýmsu húsnæði. Fékk skólinn af því tilefni viðurnefnið Hlaupabrautin. Á tíunda áratug síðustu aldar tókst að koma upp glæsilegri byggingu sem í huga margra gengur undir nafninu Gula húsið. Horn ráða þar ríkjum og hátt er til lofts, víðáttumikill gluggi í suðri en í norðri eru loftkældar kennslustofur á þremur hæðum og horfa allar til Ingólfsfjalls. Glæsilegra skólahúsnæði er vandfundið á þessu landi. Fullyrt er að bygging skólahúsnæðis FSu hafi tekið mun styttri tíma en venja var um byggingar af þessari stærðargráðu. Ástæðuna má fyrst og fremst rekja til samtakamáttar sunnlenskra sveitarstjórnarmanna þess tíma sem lögðu fram fé til byggingarinnar og forystu heiðursmannsins Þórs Vigfússonar þáverandi skólameistara. Megi frumkvæði, sköpun og upplýsing ávallt fylgja starfi FSu.

Á ljósmyndinni má sjá frá vinstri Sigursvein Sigurðsson núverandi aðstoðarskólameistara, Þórarin Ingólfsson fráfarandi aðstoðarskólameistara, Olgu Lísu Garðarsdóttur skólameistara FSu og Svan Ingvarsson sviðstjóra verknáms, auk blóma, fána, flygils og pontu.

jöz.