Fréttir

Fróðlegur og vel skipulagður fundur fulltrúa KÍ var haldinn á sal FSu (Gaulverjabæ) þriðjudaginn 5. september. Hófst hann klukkan 16.30 og lauk á slaginu 18.00. Hugmyndin með fundinum er að kynna skólastefnu Kennarasambandsins, starfsemi þess og orlofs- og endurmenntunarsjóði. Er fundurinn haldinn í hringferð sambandsins um landið til að upplýsa félagsmenn og efla með þeim stéttarvitund og fagmennsku í starfi.

Við upphaf hvers skólaárs verða alltaf ákveðin mannaskipti í starfsliði FSu. Einir koma - þá aðrir fara eins og orðtakið segir enda er FSu fjölmennur og lifandi vinnustaður með um það bil eitt þúsund nemendur og starfsmenn.

Nú á haustdögum verður boðið upp á fjölbreytt námskeið á Garðyrkjuskólanum að Reykjum og á fleiri stöðum. Til dæmis verður hægt að kynna sér grunnatriði skógræktar, aðferðir við að gera skreytingar úr nátturuefni og margt fleira sem áhugafólk um náttúru og náttúrunýtingu hefur áhuga á.

Kennsla hófst í FSu 18. ágúst síðastliðinn en dagana á undan komu kennarar til undirbúnings. Skrifstofa skólans opnaði gáttir sínar í byrjun vikunnar þar á undan og stjórnendur komu til starfa. Skólameistari Olga Lísa Garðarsdóttir bauð nýnema velkomna á sal skólans (Gaulverjabæ) á sérstökum nýnemadegi þann 17. og lagði áherslu á að allir í skólasamfélaginu ynnu saman að sameiginlegu og menntandi markmiði. Umhverfismál og dagleg umgengni og virðing fyrir umhverfi okkar var henni ofarlega í huga enda eitt helsta viðfangsefni samtímans.

Helgina 2. júní til 4. júní síðastliðinn var haldið sveinspróf í húsasmíði við FSu en sveinspróf iðngreina krefst mikils undirbúnings bæði af kennurum og nemendum. Prófið hófst stundvíslega klukkan 8.30 en prófað er bæði í bóklegum efnum og verklegum. Að sögn Lárusar Gestssonar fagstjóra tréiðna er sveinspróf „hvort tveggja í senn afar skemmtilegur en krefjandi tími fyrir nemendur. Mikil vinna á krefjandi lokaönn í skóla og svo þriggja daga lokapróf.”

Endurmenntun er nauðsynlegur þáttur í öflugu skólastarfi og eru starfsmenn FSu duglegir að sækja sér slíka menntun. Á síðasta skólaári 2022 til 2023 sóttu 24 starfsmenn alþjóðleg endurmenntunar námskeið víða í heiminum. Árið 2021 fékk skólinn Erasmus+ styrk til endurmenntunar en vegna ástandsins sem Covid skapaði var í raun ekki hægt að nýta hann fyrr en árið 2022 og var hann fullnýttur vorið 2023.

Það var margt um manninn við vorútskrift nemenda FSu föstudaginn 26. maí. Enda 146 nemendur að ljúka bóknámi, listnámi og verknámi. Aldrei í sögu skólans hafa fleiri nemendur útskrifast í einu. Útskriftardagur er alltaf gleðidagur með föstu skipulagi þar sem ræður eru fluttar og hefðbundinn annáll starfseminnar, prófskírteini afhent og viðurkenningar fyrir framúrskarandi árangur í námi og félagslífi, lög leikin og ljóð sungin, fullorðnir kennarar og annað starfsfólk kvatt eftir áralöng og gifturík störf.

Kennsla í fangelsunum gengur vel og alltaf mikill áhugi í verklegum greinum. Á Litla-Hrauni hefur verið kennd trésmíði í tvö ár og alltaf fullskipað í greinina. Aðstæður eru prýðilegar þar sem kennslan fer fram á trésmíðaverkstæðinu undir stjórn Jóns Inga Jónssonar verkstjóra. Jón Sigursteinn Gunnarsson trésmíðakennari í FSu kemur einu sinni í viku og kennir nemendum.