Fréttir

ERLENT samstarf skóla er mikilvægt í námi nemenda og ekki síður í skólaþróun. Er samstarfið þá oftast myndað á milli þriggja skóla frá þremur löndum í gegnum evrópska menntasjóði þar sem ákveðin umfjöllunarefni eru tekin til skoðunar. Í gegnum árin hefur FSu verið virkur þátttakandi í slíku samstarfi sem hefur opnað fjölmörgum nemendum aðgang að ólíkum löndum og fjarlægum menningarheimum.

Heimsóknir gesta eru alltaf ánægjuleg tíðindi í skólastarfi. Þeir koma líka í ákveðnum tilgangi og með markmið í huga. Rithöfundar sem lesa upp, leikhópar sem setja upp sýningu, tónlistarfólk, fræðimenn af öllu tagi, sálfræðingar að tala um geðheilbrigði, prestar að tala um sorgarviðbrögð, læknanemar með fræðslu um eðlilegt kynlíf eða ungir fulltrúar annarra skóla að kynna nám að loknum framhaldsskóla og svo mætti lengu telja. Það er alltaf mikilvægt og jákvætt að brjóta upp hefðbundið skólahald með heimsóknum.

„Því óvíst er að vita hvar óvinir sitja á fleti fyrir” segir í Hávamálum og kannski má heimfæra þessa lýsingu á nýjustu uppákomuna í FSu þegar skólanum var lokað miðvikudaginn 27. október vegna kórónuveiru faraldurs. Skyndilega í byrjun síðustu viku fóru starfsmenn að veikjast og brá skólameistari strax á það ráð að loka skólanum í samráði við rakningateymið. Ekki var ljóst í hvað stefndi og það svo metið að allur væri varinn góður.

VETTVANGSFERÐIR eru mikilvægar í öflugu skólastarfi. Þá er hurðinni að kennslustofunni hallað og gengið út í lífið í þeim tilgangi að skoða og rannsaka það sem finna má og sjá þar fyrir utan: mannlíf og menningu, listsköpun af ýmsu tagi, atvinnulíf og nýsköpun, opinberar stofnanir og hús sem vert er að heimsækja og síðast en ekki síst ÍSLENSKA NÁTTÚRU og undur hennar.

Þverfagleg samskipti milli ólíkra eða líkra námsgreina færast í aukana í framhaldsskólum. Enda er hvatt til þess í opinberri námskrá að finna flöt á slíku samstarfi. Víða má finna þetta samstarf í kennslu FSu eins og í verknámi þar sem tré, vél og rafvirkjun vinna vel sama og í íslensku þar sem skapandi skrif og leiklist eiga virka samleið. Leiðirnar eru margar að öflugum og þverfaglegum samskiptum en það sem mestu máli skiptir er að sveigjanleiki sé til staðar í kerfinu til skapa jarðveg fyrir slíku samstarfi.

Alkunna er að Fjölbrautaskóli Suðurlands sinnir kennslu fanga á Litla Hrauni og að Sogni. Það hefur skólinn gert í áratugi og kennslustjóri er Gylfi Þorkelsson. Aðstaðan til kennslunnar er ekki sambærileg fullbúnu skólahúsnæði og ræðst því námsframboðið talsvert af því.

Sveinspróf í VÉLVIRKJUN var haldið í FSu dagana 10. til 12. september. Fimm nemendur þreyttu prófið sem skiptist í fjóra hluta. Fyrst var tekið tveggja tíma skriflegt próf úr öllu námsefni síðustu þriggja ára með fjölbreyttum spurningum þar á meðal um burðarþol stáls og um réttindi og skyldur á vinnustað. Þá var hafist handa við smíðina og unnið í rennibekk og fræsara. Að lokum voru tekin suðupróf, bilanagreiningarpróf á stórri díselvél og framkvæmdar slitmælingar á vélum.

Fullyrða má að í námi nemenda hefur áhersla aukist á að örva skapandi hugsun á öllum skólastigum. Er það á pari við þá þróun sem orðið hefur í kennsluháttum og viðhorfum til náms á tímum upplýsingatækni í skólastarfi. Staðreyndabundna þekkingu er ekki eins mikilvægt að kenna og áður var. Nemendur sækja sér hana eftir margvíslegum leiðum á rafrænu formi. Þess vegna er í auknum mæli lögð áhersla á FÆRNI og HÆFNI til að vinna úr upplýsingum, túlka og skapa.